相信呢一場仗 有你一定會贏

(9月30日晚小麗集氣大會發言)

最近好多人問我:「你係咪Plan B?」但我想話俾大家知,我哋只有一個plan,唔係Plan A,而係Plan V(Victory)!

我哋整個民主派只有一個Plan,就係Plan V!小麗Plan V!我哋一定要贏!

有人問我:「你做咩再次行出嚟呀?」聞戰鼓、打仗時,我哋就要行出嚟!

我初投身社會,睇到工人俾人蝦,就令我行出嚟;

八九民運,中共開槍,我哋行出嚟:

95年選舉,需要人入議會同中共戰鬥,我行出嚟;

97年臨時立法會令我哋落台,我哋再選,我行出嚟;

到最近呢兩年,我更加覺得要行出嚟!我唔係為左參選,我只係要參與Plan V!

呢兩年間發生咁多事,大家點可以唔行出嚟?我地以前有冇諗過政權會DQ六個議員?有冇諗過佢會DQ參選人?有冇諗過喺香港會有政治犯?「13+3」、旺角魚蛋事件、仲將會有佔中九子,呢啲就係戰鼓聲,要我哋出嚟打仗,大家聽到未?

今次係一場對決的仗:我哋要打低保皇黨,因為佢哋只係識得幫中央干預香港、殘民自肥。

要打呢場仗,每人要行多一步。我哋相信呢一場仗,我哋一定會贏,因為有你!