【八方相當年】李卓人中學寸寸貢 曾被訓導捉去剪頭髮

60年代四男子,影響全球文化,「嗰時讀中學,鍾意Beatles、鍾意音樂,一定要夠型,所以都跟風留長頭髮,試過畀訓導主任捉住去剪頭髮㗎,哈哈。」生於57年嘅李卓人自稱那些年「寸寸貢」,可能都係Beatles帶起嗰種反叛心態,但一到讀書就好乖,最愛讀數嘅佢成績優異入到港大讀土木工程,結果卻係走上工運之路,自爆阿媽都話過唔知佢「做緊乜」,若果無頂住家庭壓力,唔會見到由長到短、由黑到白嘅李卓人,年復年為打工仔爭取合理權益。

喺唔少組織做領導嘅阿人,原來三兄弟中排最細。由於兩個哥哥讀書叻,令佢自細覺得最緊要讀書,民生書院小學讀到預科,成績都不俗,揀港大讀土木工程,皆因當年真係有諗過做工程師,點知入到大學開始由不問世事變成關心政治,「當時大家都認中關社,啱啱毛澤東死咗,個個都探索香港同中國嘅未來,我由乜都唔識唔理,開始去關心時事」,其間幫過艇戶爭取權益,「覺得呢個世界真係非常不公義。」

有啲嘢,click著咗就返唔到轉頭,社運投入度愈嚟愈熱,阿人大學畢業後,當然冇加入工程界,反而去咗聯合醫院旗下嘅職業健康中心任職。事實上呢,佢畢業試成績麻麻,「梗係啦,全部時間去晒搞嘢,4月中先至嚟讀書,得嗰兩三個月搏命,日日去lib記(library),都係啱啱pass。」

如果當年入唔到港大,阿人話自己可能同兩個哥哥一樣去外國讀書,唔會留喺香港發展,但世事往往出人意表。佢自爆當時媽媽見佢參與咁多運動都唔多高興,「佢話都唔知我做緊乜,點解入咗大學變成咁?寧願我去外國讀書發展。」最終頂住屋企壓力走上工運路,做過前立法會議員兼喺支聯會核心,嚟緊九西補選一役,呢位自稱抗爭抗到聲線由輕柔變粗獷嘅工運領袖,或者又有重任在身。